Kasarakuy

Ñawpaq tayta mamanchikkunamanta pacham, kasarakuyqa hatu hatun raymi warmiqaripaq karqa. Kay huñunakuywanqa, sumaq musuq ayllu paqarinanpaqmi, hatun bendicionninta taytachamanta chaskikunku; imaynam ñawpaqman yakucha sinrilla rin, chayna kawsakuyninkupas rinanpaq.

Qari kasarakuyta munaspaqa, warmipa makintam mañamunan, kay rurayqa sasa sasam, allintam chay ruraytaqa yachana.

 Wakin kutipiqa warmipa taytamamankum mana munakunkuchu, aswanqa qaripa ayllunmanqa sasachakuykunatam qawaykachinku.

Anrí  niramunku  hinaptinqa  rimaykukuy punchawmantaqa qariqa ñam warmitaqa wasinman apakunña; chay punchawmantaqa, warmiqari huñunasqaña kasqanmantaqa  llaqtapiqa  huk aylluñam kanku, ima ruraypaqpas ñam iskaynintaña sutinchankupas.

Warmi qarim yachanku, hinallataq marqakuqkunapiwan, imay punchawtam kasarakuyman yaykunqaku, chay punchawkaman kuskaña kawsanku.

Kasarakuy punchawpiqa tukuy ima ruranatam, qatisqanman hinalla rurana, chaytaqa qatipana wasinmanta pacha iglesiaman yaykunankama; iglesiapiñam tayta cura kasarakunankupaq misataqa ruran.

Ichaqa, warmipa makinta mañamuptinku manaraq warmi - sipas qariwan tiyan chay pachaqa, chay kasarakuy punchawqa puñuchinkupunim, chaypas qaripaqqa huk sasachakuymi.

Raymiqa tukun warmi qariman  kawsayninkunata allin sumaqta taqipuptinkuñam, mana imankupas pisinanpaq.

Kay musuq aylluqa kuskañam chay punchawmantaqa, hatun ayllupi tukuy llaqtapa rurayninkunapi hatarinanku.