Waka marcay

Perú mama suyunchikqa ancha tukuy ima kawsaykuna,  yachaykuna, rimaykuna, uywakuna, sachakuna waqaychaqmi. Chaymi aswan allinta risqsipaspa yachayninkunata  chaninchananchik.

Kay Apurímac chaynallataq Ayacucho nisqan suyukunam kuskalla kachkanku, chaymi tusuyninkuna, takiyninkuna, yachayninkunapas niraq puralla, Chicha nisqan hatun mayupa rakisqallan waqtankunapiqa, kay  llaqtakunapiqa  sumaq ayllukunam kan.

Iglesia Pata  llaqtaqa,  Apurímac suyupa  puchukayninpim tarikun. Kay llaqtapim tukuy yachaykuna tarikun. Kay qillqapim,  ñawpaq  waka marcay utaq waka cintachiy nisqan, imayna apakusqan yachaymanta kunanqa qawarisun.

Iglesia  Pata  llaqtamanta:

Kay llaqtaqa Wayra Pata, sutiyuqsi kasqa, ancha wayrapa kasqan rayku. Antawaylla llaqtamanta pachak pichqa waranka karu tupuypim kachkan. Chicha mayupa waqtanpim, Siwi, Payco, Paucaray, Ayacucho suyupa chimpanpim tarikun.

Waranqa isqun pachak pusaq chunka pasaq watakunataqa, ancha llakipim runakuna wañuchinakuptin, chinkachinakuptin tarikurqaku; chay sasachakuykuna raykun kay llaqtakunapi tiyakuqkunaqa illayta, ripuyta qallarispanku, chinnirparirqaku. Chaymi chakrankupas manaña ñawpaq pacha hina tarpuptinku kunankama purmarparin. Wakcha kaypas hinaraqmi kachkan.

Waranqa isqun pachak qanchis chunka watapim, Yachay wasin paqarirqa, ñawpaqtaqa Chaccrampa llaqtapiraqmi, unay purinapiraq, yachaq rirqaku.  Iskay waranqa watapim pichqa yachachiqniyuq karqa.  Kunan qipa watakunamanqa, wakin yachachiqmi contrata nisqallanpi kaspanku, mana Yachay wasipi chiqan llamkayta aypankuchu. Kanmi trocha carretera,  ichaqa paray ukupiqa manam carro chayanchu.

Amawtakunaqa kuyakuyniyuq, warmakunapaq ayllupaqpas allin kawsakuynin munaqkunam, chaymi paykunawan kuska yachaykuna, ruraykuna ñawparichiyta munaniku.